Wakaazi wa Marsabit watakiwa kuzuru maeneo ya vivutio jimboni ili kupiga jeki Utalii

Na Samuel Kosgei

Kaunti ya Marsabit ina uwezo mkubwa wa kuvutia watalii wengi iwapo juhudi na mikakati mwafaka itawekwa. Hayo ni kulingana na katibu mkuu katika idara ya utalii kaunti ya Marsabit Guyo Ali.

Hata hivyo Afisa Ali akizungumza na shajara ya Radio Jangwani amesema kuwa kuna ongezeko kiasi ya shughuli za kitalii katika eneo pana la Jangwa La Chalbi na Ziwa Turkana ikilinganishwa na miaka ya nyuma.

Wakati uo huo amesema kuwa mbuga ya kitaifa ya Sibiloi iliyo kaunti ndogo ya Illeret haifanyi vyema kwenye suala la kuvutia watalii wa kutokana na umbali na ubovu wa barabara ya kwenda huko.

Anasema suala la mabadiliko ya tabia nchini huenda imechangia wanyamapori kuhama au kufa katika sehemu hiyo.

Amerai wakaazi wa Marsabit kuinua sekta ya utalii kwa kuzuru vivutio vyenyewe bila kutegemea tu watalii wan je ya nchi.

Anasema pia mengi yanahitajika kuwekwa yakiwemo mikakati na sera mwafaka ili kufahamu kiwango cha pesa kinachopatikana kutokana na shughuli za kitalii kaunti ya Marsabit.