Wananchi walio karibu na Ziwa Turkana watakiwa kuchukua tahadhari msimu huu wa mvua.

Na JB Nateleng

Wakaazi wanaoishi kando ya Ziwa Turkana kaunti ya Marsabit wametakiwa kuwa waangalifu zaidi msimu huu wa mvua ili kujikinga dhidi ya mashambulizi ya mamba.

Akizungumza na Shajara mwenyekiti wa Kitengo cha Usimamizi wa Ufuo wa Bahari (BMU) cha Loiyangalani, Martin Losunyen, amesema ni muhimu kwa wananchi kuchukua tahadhari na kuepuka maeneo yanayojulikana kuwa mazalia ya mamba.

Losunyen pia amewatahadharisha wavuvi wanaoendelea na shughuli za uvuvi katika Ziwa Turkana kuhakikisha wanatumia vifaa vinavyofaa na salama ili kupunguza hatari ya kukumbana na mamba.

Aidha, amewashauri wanafunzi pamoja na wageni wanaotembelea Ziwa Turkana kufuata maelekezo ya wanachama wa BMU au maafisa wa uvuvi kuhusu maeneo salama ya kutembelea ili kuepuka hatari ya kushambuliwa na mamba.